水PU鸡蛋（不懂吴方言者免进）

pureshadow · 发表于 2010-8-22 23:09:43

小妖同学从小就邪气欢喜吃鸡蛋，勿管是啊里一种烧法才欢喜格。小辰光妖妈专门问：“阿囡啊，今朝是要吃荷包蛋蛋呢哎是水PU蛋蛋？”基本浪茶叶蛋是勿会得BE问到格，因为迭个么事勿是十分钟之内可以冒得出来格……
慢慢较，小妖同学长大了，会得野出去了，外头啊有人问要啊里种蛋蛋格，基本浪是勒茶叶蛋搭荷包蛋之间格选择，再啊呣么宁问过水PU鸡蛋。
总算有一天，小妖同学勿是一家头过日家了，某天早浪厢，某猪同学兴冲冲格问小妖同学要吃啥蛋蛋，小妖同学居然一记头BE噎牢勒，因为伊从来勿晓得迭个水PU鸡蛋个PU普通闲话拿能讲汉字拿能写，后来只好结结巴巴格讲：“要……水……那个那个……蛋蛋……”
啊下来当然是某猪同学兴冲冲格去烧水PU鸡蛋了，再啊下来，某猪同学兴冲冲格冲出厨房问：“要烧多久？”
小妖同学肚皮里钻念头：指望伊烧只酸菜鱼出来是勿要想格，但不过水PU鸡蛋，应该呣么啥格难度吧？所以叫白了伊一眼设：“水开了就好了！”
勿晓得某猪同学一眼眼啊勿接聆子，还是呆呆问：“开了就好了？那能熟吗？”
小妖同学勿耐烦了：“水……那个那个……蛋蛋……就是要半生的！”顺便，一只鞋子掇过去。
某猪同学只好勿声勿响格又钻回厨房。
过特十分钟，小妖同学想想水PU鸡蛋冷得差勿多可以吃了，放下手里格生活钻进厨房……呆特！
只见两只勿剥壳格蛋蛋趴勒格锅子里！